أنا بكره شكلي جدًا جدًا، والموضوع ده خلى ثقتي في نفسي معدومة.
أنا شبه ما أعرفش حاجة عن الثقة بالنفس،
وأنا أصلًا عندي مشاكل مع موضوع الأكل وكده،
وإن مفيش شهية أوقات كتير جدًا، وبالتالي ده مُنعكس على وشي،
بـ يكون رفيع، وشاحب….

أنا شعري كيرلي، وبحبه جدًا
تعبت من كلام الناس الغبي،
ونزولي الشارع من أوحش الحاجات الـلـي بـ تحصل لي
مغص فظيع كل ما آجي أنزل، مش عارفه ده social anxiety ولا إيه
أنا عندي ثقة في نفسي، وبحب شعري،
وكان نفسي الناس تتقبل الاختلاف

الشارع، الشعر

بابا كان بـ يضربني علشان أنا تخينة.
وانا 13 و14 سنة، ماما كان عندها يقين إني مش هـ تجوز
علشان أنا مليانة.

قبل ما أبويا يتجوز أمي كان خاطب واحدة قبلها اسمها عايدة
أمي سألته: "ليه سبتها؟"
قالها "أصل كان عندها مرض في رجلها... واكتشفته لما شفتها بالمايوه"

الوصمة الاجتماعية، الضغوط الاجتماعية، معايير الجمال، الجسم

قعدت سنين طويلة أعمل شعري، واحط ميك اب،
لدرجة إني نسيت شكل شعري الطبيعي
كان بالنسبة لي يوم الأجازة إني أغسل شعري، وأسيبه بطبيعته
كنت بـ حس براحة مش طبيعية.

عيلتي كلها شعرهم ناعم ومفرود
أنا الوحيدة اللي شعري كان كيرلي
كانوا على طول يقولوا لي: "جايبة الشعر الوحش ده منين؟"
مامتي ما كانـتـش بـ تعرف تـعـتـنـي بيه
الناس كلها كانت بـ تـمـدح أختي وجمال شعرها
وأنا، بـ يـبـصوا لي بصة شفقة.

أنا دايمًا بحب الشعر الكيرلي،
بس عمري ما كنت بـ عرف أعمله مظبوط
وما كـنـتـش أعرف أصلًا إن شعري كيرلي
كنت معتبرة إن شعري هايش عشان محتاج اهتمام
وفي مرة روحت عملت بروتين، الكوافيرة غسلت شعري ونـشـفـتـه بالـسـشـوار من بعيد
وكانت أول مرة أشوف شعري بالمنظر ده

عمري ما عرفت يعني إيه أحس إني جميلة؛
كل يوم بيفكروني إني تخينة،
وإن شعري المنكوش شكله وحش،
وإن وشي شكله غريب.
ماما نفسها بـ تقولي كل يوم إني لازم أخس.

جدتي من ناحية بابا كان دايمًا معاها فرشة وكريمات شعر كتير
عشان تظبط بيهم شعري المنعكش
كانت بـ تخليني أقعد على ركبتي وتشد شعري جامد لحد ما تسلّكه
وبعدين كانت بـ تغرَّقه كريم عشان تقدر تعمله كحكة أو ضفيرة،
لحد ما التمويجات اللي فيه تختفي خالص

أنا كنت بـ كوي شعري على طول
وكنت مرتبطة، وبعدها ما حـصـلـش نصيب بينا
وبعد ما سيبنا بعض،
قررت إني أربي شعري الطبيعي وابقى حرة بطبيعتي
رجعت لـلـي كنت مرتبطة بيه زمان، وكويته مرتين عشانه
في مرة بقول له إني جاية له بشعري الطبيعي
قال لي بالنص: "نعم! جاية بيه كده ليه؟"